This is a Clilstore unit. You can link all words to dictionaries.

شو ها ربيع العربي؟

من سنتين الناس بكل العالم بيحكوا عن قصة "الربيع العربي". وين ما بتروح هل حكي قدامك. تفتح إزاعا تسمع هل حكي، تشوف تلفزيون تسمع هل حكي، تقرأ جرايد ما فيه غير هل حكي. وأنا مو فهمان شو معنى "الربيع العربي". اللي بعرفو أنو البلدان العربية كان فيها مشاكل، وهلا هاي المشاكل صارت أكتر وأكبر. بشوف أنو الناس عم تموت، أو تهرب من بيوتها، والبلدان العربية فيها فوضى، والإقتصاد تعبان، والفقر بيزيد. إي شو علاقة هاي بالربيع؟

أنا بعرف أنو الربيع هوي موسم الأزهار، والورود، والحب، والأمل. لما يجي الربيع الناس لازم يفرحوا، وينبسطوا، ليش؟ لأنو الربيع أجمل فصل من فصول السني. الطقس يصير حلو، البرد يروح، والشمس تطلع كل يوم. والطيور، حتى الطيور نسمعها وهي بتغني عل أشجار. كل شي يصير أحلى بالربيع.

بس شو علاقة هاي بهاي؟

يبدو أن الناس لما يحكوا عن "الربيع العربي" ما عم يفكرو بالأزهار، والورود، والحب، والأمل، ولا بالشمس والطيور. الناس عم يفكرو بالديمقراطية والحرية، وحقوق الإنسان. هوي هادا معنى الربيع العربي!

والله بعدني ما فهمت شي. نحنا هون في الدنمارك، فيه عندنا ديمقراطية، وحرية، وحقوق الإنسان طول السني، بالصيف، وبالشتي، وبالخريف، وبالربيع. وما حدا يقتل حدا، والإقتصاد ماشي تمام، وفيه أمان، ونظام.

يعني ليش ربيع العرب كلو قتل، ودم، وليش ما بيصير عندهم ديمقراطية، وحرية إلا بالربيع؟ بعدين وين حقوق الإنسان؟ لَمن أسأل من شان يعطيني جواب؟ تعرفوا شي حدا يفهّمني شو ها ربيع العربي؟

Short url:   http://multidict.net/cs/1084