This is a Clilstore unit. You can link all words to dictionaries.

'Leanbh Lae' le Biddy Jenkinson

‘Leanbh Lae’ le Biddy Jenkinson 

Í glanfhuinte

a hanam nuacheaptha ag broidearnach

i gcró na baithise.

Craiceann chomh caol

nach n-aithníonn méar a slíoctha thar an aer é

teann is buan

ag fíoradh géag.

 

Éan a sciuird as ealta na neamhbheo

is thuirling traochta

cleití crutha caite sa chliabhán

in éarlais fillte

í tugtha suas don suan.

 

Fairim a tarraingt chaol ar aer an tsaoil.

Leanaim luail béil a dhearbhaíonn go subhach

nár baineadh í de dheol an dorchadais.

 

Iarraim a greim muiníne ar mo mhéar

is meallaim í.

Tiocfaidh lucht féiríní.

Tiocfaidh Cailleach an bheara

Is ní féidir í a choinneáil amach.

 

Le caoinchead Biddy Jenkinson agus Coiscéim. Céadfhoilsíodh in Baisteadh Gintlí (Coiscéim, 1986).

Máirín Nic Eoin: Go hálainn. Léiríonn an dán leochaileacht an linbh thar aon rud eile domsa ach na bagairtí agus na contúirtí a fheiceann an mháthair chomh luath agus a thagann an leanbh ar an saol.

Biddy Jenkinson: Sin é agus gur gá di an leanbh a mhealladh freisin. Caithfidh sí bonn socair a chur faoin saol don leanbh, a thabhairt le fios go bhfásfaidh sé agus go mbeidh cúrsaí i gceart thart air agus a fhios aici go rí-mhaith nach bhfuil smacht ná cumhacht aici ar na cúinsí seo. Ach bíonn orainn ar fad é a dhéanamh.

MNE: Tharraing tú an chailleach isteach sa scéal, cailleach an bheara, lucht féiríní agus ansin tagann an chailleach agus ní féidir í a choinneáil amach.

BJ: Bhíos ag cuimhneamh ar an scéal sin ‘Codladh Céad Bliain’. Saolaítear iníon don rí agus don bhanríon agus gach aon saghas saibhreas agus áilleacht le fáil aici ach go dtagann an chailleach ag an bhfleá agus go gcuireann sí mallacht áirithe uirthi agus nach bhfuil rud ar bith gur féidir le héinne a dhéanamh seachas fanacht, agus feitheamh go dtagann an prionsa. Ach ní prionsa atá i gceist agamsa ach just bagairt a bheith ann agus an leanbh a dhíonadh ar an mbagairt sin in ainneoin a fhios a bheith agat go dtiocfaidh sé.  

Short url:   http://multidict.net/cs/2235