This is a Clilstore unit. You can link all words to dictionaries.

Juri Dutta reading Assamese poem

তুমি মোৰ উৎস সৰোবৰ

কবি: বিপুলজ্যোতি শইকীয়া

 

নদীৰ দৰে মই উলটি আহোঁ তোমাৰ ওচৰলে’

তুমি আঁকোৱালী লোৱা মোৰ অপৱিত্ৰ মুখ ।

 

মোৰ কবিতাৰ স’তে থাকে তোমাৰ স্পৰ্শৰ শব্দ

মেঘৰ দৰে তোমাৰ অনিবাৰ্য ঠিকনা

সংগোপনে সাৰে থাকে গভীৰ বুকুত

পাহাৰী জুৰিৰ বুকুত যি দৰে অঁকা থাকে ভৈয়াম স্পৰ্শৰ আকুলতা ।

 

অবাটেৰে গৈ মই বাৰে বাৰে উলটি  আহোঁ তোমাৰ ওচৰলে’

তুমি চুম্বন কৰা মোৰ পথৰ ক্লান্তি, দীৰ্ঘ শ্ৰমৰ দুখ ।

 

ইমান বিষাদ লৈ কেনেকৈ উৰি যায় তোমাৰ ওঁঠৰ চৰাই,

কেনেকৈ সেউজীয়া হয় তোমাৰ নীলকণ্ঠ কৰতল, মোৰ দগ্ধ বুকুৰ

হাতত

কেনেকৈ তুলি দিয়া অৰন্যৰ প্ৰথম প্ৰভাত ।

 

সকলো শূন্যতাৰ পৰা মই উলটি আহোঁ তোমাৰ ওচৰলে’

তুমি ক্ষমা কৰি দিয়া মোৰ নষ্ট ভৰিৰ

অপৰাধী খোজ, মোৰ অপ্ৰতিদ্বন্দ্বী পাপ ।

 

নদীৰ দৰে মই উলটি আহোঁ তোমাৰ ওচৰলে’

তুমিয়েই যে মোৰ উৎস সৰোবৰ    

Short url:   http://multidict.net/cs/8111